اساحبتى
اهلا اهلا اساحبتى ....اتفضلى واقفة ليه على الباب ...يلا سجلى بايدك اليمين

اساحبتى

احلى منتدى اسلامى لاحلى صحبة ستات و بس :)
 
الرئيسيةاليوميةس .و .جبحـثالأعضاءالمجموعاتالتسجيلدخول

شاطر | 
 

 ملف اكلات اقتصادية شهية

استعرض الموضوع السابق استعرض الموضوع التالي اذهب الى الأسفل 
كاتب الموضوعرسالة
ريمونتى
مشرفة
مشرفة


عدد المساهمات : 11
نقاط : 13
تاريخ التسجيل : 20/09/2012
العمر : 37

مُساهمةموضوع: ملف اكلات اقتصادية شهية    الجمعة سبتمبر 21, 2012 11:59 pm

[/center]تحبوا تعملوا خير ؟
تحبوا حد يدعيلكم بظهر الغيب عشان علمتوه حاجة تسهل عليه امور حياته؟

ناس كتير بشوفها طالبة ميزانيات
او اكلات موفرة

المهم شوفت من يومين طلب لأخت
المهم طلبت اكل بلحوم لعدد افراد كبير
وفى نفس الوقت المتوفر مش كتير عندها No


قررت انى اعمل الملف ده وحايكون متجدد يعنى الوصفات مش فى اول صفحة بس
واللى تحب تشارك بوصفة ياريت تشارك بيها
بس تكون فيها فكرة وتجديد لو امكن مع حساب التكاليف بالتقريب
لا عاوزة تقييم
ولا ردود
انا ابتغى وجه الله الكريم فقططط ويكون علم ينتفع بيه ينفعنى كصدقة جارية يوم تنقطع اعمالى الا من ولد صالح يدعو لى او صدقة جارية او علم ينتفع به

وتيسير وتفريج كربة عن اخت ليا
وعلى فكرة ممكن تستغلوا الافكار دى لو بتعملوا اطعام للمحتاجين
عشان لو ميزانيتك مضغوطة شوية ونفسك تعمملى اطعام
اهو يا ستى افكار تقدرى تعملى بيها لبيتك وتوكلى اسرة تانية


المهم قلت حاعمل صينيتين مكرونة بشاميل بالفراخ
الصينية الواحدة تكفى 4 او 5 افراد
والصينيتين بفرخة واحدة سعيدة قوي

الصينيتين مقاس 25
لو صوانيكى اكبر وعدد اسرتك 5 يبقى تزودى بصلة وفلفلتين رومى وممكن جزرة مبشورة
اتصرفى انتى اساحبتى ست بيت وشاطرة

امبارح جبت الطلبات دى وقلت حانفذ عملى واشوف فكرتى حاتنجح ولا لأ عشان بجد كان نفسى اساعد

جبت كيس مكرونة اخوان انطونيو ن فتح الله ماركت 1 كيلو ب 3.5 جنيه وانا استعملت كيس وتلت يبقى المجموع 4.5 جنيه (انا جبت اسباجيتى عشان بحب مكرونتى بيها اكتر من البنا
واللى بتحب بالمكرونة البنا اوك)
لو صوانيكى كبيرة ممكن تزوى نص كيس بدل تلت كيس

نص كيلو لبن ب 3 جنيه وممكن تعملى بلبن بودرة حاتبقى التكلفة اقل
لاجظى اننا حانسلق الفرخة وحاناخد شوربتها نزودها على اللبن والدقيق ونعمل بشاميل جميل

توابل (ملح وفلفل ورشة قرفة حانقول بربع جنيه)

فرخة ساديا 1100 جرام من فتح الله ماركت لقيتها ب 21 جنيه
(لقيت ان كده اوفر من انى اجيب البلدى من الفرارجى وقلت دى للحشو فا تبقى مناسبة)
واللى عاوز يجيب نص كيلو فراخ بانيه اوك ويحط عليهم معلقتين زبادى من قبلها بيوم يطريهم كتتبيلة واللى عاوز يجيب فرخة من الفرارجى عادى كمان واحسبى انتى فرق التكلفة مش حايبقى كتير

دقيق للبشاميل ممكن نقول بنص جنيه مثلا

بيضة للبشاميل وممكن من غير
ب 60 قرش ولو بلدى ب 75 قرش

4 بصلات كبار
ممم ممكن نقول بجنيه

نص كيلو فلفل رومى (ب 3 باين؟ مش فاكرة كان عندى اصلا)

انا بعمل البشاميل فات فرى
اللى حابب يبقى يزود زيت او سمنة للتكاليف عشان البشاميل

المجموع
21 فرخة
4.5 مكرونة
3 لبن
0.5 توابل
0.5 دقيق
0.75 بيضة
3 فلفل رومى
1 بصل
-------
34.25 جنيه
نقسمهم على 2 = 17.12 جنيه للصينية لليوم لأسرة مكونة من 5 افراد
اعتقد معقول

وتقدمى جنبها سلطة خضرا (تعمل حوالى 3 جنيه)
و سلطة روسى
اللى هى جزر وبطاطس وبلسة مسلوقين وعليهم ملح وفلفل ومايونيز(ممكن بدال المايونيز خل وتومة مطشوشة فى معلقة زيت حلوة اوى)
ربع بسلة + نص جزر + نص بطاطس
2.5 + 1.5+1.25=5.75 جنيه

تكلفة اليوم كله 26 جنيه تقريبا
والطبق الجانبى ممكن تغيريه حسب ماتحبوا

الطريقة

حانسلق الفراخ
بعد مانكون نقعناها طول الليل فى خل وملح وفلفل وجنزبيل بودرة واى توابل تحبيها فى التلاجة

بعد ماتتسلق تاخدى ورك وصدر تفصصيهم
وتنسليهم نسل رفيعة
وتقطعى عليهم بصلتين كبار وربع فلفل رومى و3 فصوص توم وملح وفلفل وكوب ماء
تخليهم يستوى مع بعض لغاية لما الماية تنشف
تنقليهم طبق لوحدهم
آدى نصيب اول صينية

وتكررى نفس الخطوات مع النص التانى
انا باخد ورك مع صدر عشان تبقى القسمة بالحق سعيدة قوي عشان الصدر لحمه اكبر
وبسوى البصل والفلفل فى ماية عشان مش ناقصة دهون بقى فا مش عاوزة اشوحهم
اللى عاوز هو حر


انا تعبت اوى عشان اقعد اكتب واتحرك من المطبخ للكومبيوتر فى الحر والصيام ده
عشان والله تستفيدوا

من فضلكم لو افتكرتونى تدعولى انا واهلى اجمعين بالشفاء شفاء لا يغادر سقما
واننا نكون من عتقاء الرحمن من النار انا واهلى كلهم ومن مات منهم

وربنا ينبتلى ابنتى نباتا حسنا
الرجوع الى أعلى الصفحة اذهب الى الأسفل
معاينة صفحة البيانات الشخصي للعضو
ريمونتى
مشرفة
مشرفة


عدد المساهمات : 11
نقاط : 13
تاريخ التسجيل : 20/09/2012
العمر : 37

مُساهمةموضوع: رد: ملف اكلات اقتصادية شهية    السبت سبتمبر 22, 2012 12:01 am

نفس النص فرخة ممكن تحشوا بيها لفة جلاش وتعملوا جنبها اى طبق جانبى
لفة جلاش ب 3.5
10.5 نص فرخة
ربع فلفل رومى 1.5
بصلتين كبار نص جنيه
معلقتين زبدة مع معلقتين زيت متسيحين عشان ندهن الجلاش 1 جنيه تقريبا

كوب لبن ب 1 جنيه
بيضة عشان نسقى الجلاش مع اللبن ب .75 قرش

تكلفة صينية الجلاش
18.75 جنيه

وحطوا طبق سلطة وشوفوا اى طبق جانبى تانى يريحكم

---------------
نص الفرخة التانى يتعمل بيه كانيلونى
لما اعمله حادخل اكتبلكم التكاليف عشان لسة مش تفذت الكانيلونى مع حساب التكاليف ماشى

يلا انطلقوا هاتوا افكار

------------------

لو جبتى اساحبتى كيلو مفروم ممكن تعملى بيه ايه؟
اقولك انا

كل ربع ممكن تعمل بيه اكلة
اول ربع تزود عليه فلفل رومى وتقلى بدنجان وبطاطس وتعمل صينية مسقعة (5 افراد) وعيش ومخلل

تانى ربع صينية جلاش مع الحباش بتاعها بقى فلفل وبصل وزتون (5 افراد) ومعاها بطاطس محمر وسلطة

تالت ربع صينية كوسة بالبشاميل (5 افراد ) ومعاه رز وسلطة

رابع ربع تحشى بيه بطاطس صغيرة ومعاها مكرونة بالصلصة وسلطة (5 افراد)

تسلم ايدك وافكارك
الرجوع الى أعلى الصفحة اذهب الى الأسفل
معاينة صفحة البيانات الشخصي للعضو
ريمونتى
مشرفة
مشرفة


عدد المساهمات : 11
نقاط : 13
تاريخ التسجيل : 20/09/2012
العمر : 37

مُساهمةموضوع: رد: ملف اكلات اقتصادية شهية    السبت سبتمبر 22, 2012 12:10 am

[b]
بيتزا المكرونة اساحبتى وصفة
تجنن والاطفال والشباب بيحبوها

كيس مكرونة ب 1.5 (ماركة اخوان انطونيو ومتوفر فى فتح الله ماركت وممكن من بتاع التموين عادى وطبعا ممكن اى ماركة متوفرة عندك
انا بس بحط اقل سعر عشان اضغط التكلفة )

الحشوة ممكن تكون 1/8 بسطرمة ب 5 جنيه
او ربع فرخة (صدر ) مسلوقة ومتقطعة نساير بحوال 5 جنيه لو مجمدة او 6 او 6.5 لو طازة
كبد وقوانص اربع فرخات (واقفين عليكى ببلاش ابتسامة )


بصلة ترنشات 0.25 قرش مثلا او اقل
فلفلتين رومى ترنشات 1 جنيه

شوية زتون مفصص جاهز او مفصص فى البيت اللى عندك (هاتوا اخضر بلاش اسود عشان بيكون مصبوغ ورنيش مش ناقصين سرطان) ب 2 جنيه

معلقتين صلصة مدوبين فى ربع كوب ماء وملح وفلفل وفصين توم مهروسين ورشة زعتر (واخدين غلوة على النار) يتوزعوا على المكرونة وهى مفروشة فى الصينية
حانقول تكلفتهم 1 جنيه

معلقتين زيت او زبدة او سمنة يدهن بيهم الصينية نص جنيه

1/8 جينة رومى او شيدر مبشورين ب 4.25 لو الكيلو ب 35 جنيه

المجموع 15.5 او 16.5 جنيه لأسرة 4 او 5 افراد
وحنبها سلطة ب 3 جنيه (طماطم وخيار وممكن جزمة جرجير ب .25 جنيه يبقى 3.25)
وكيلو بطاطس مقطع ودجز ومسلوق نص سلقة
وبعدين تصفى الماية وتحطيه فى صينية وتحطى 4 معالق زيت كبار وملح وفلفل وكمون وتخلطيهم مع البطاطس كويس بايدك وتدخليهم الفرن يكملوا سواهم ويتحمروا ب 4 جنيه شامل الغاز ابتسامة

التوتال لليوم غدا ب 22.75 او اكتر جنيه

الرجوع الى أعلى الصفحة اذهب الى الأسفل
معاينة صفحة البيانات الشخصي للعضو
ريمونتى
مشرفة
مشرفة


عدد المساهمات : 11
نقاط : 13
تاريخ التسجيل : 20/09/2012
العمر : 37

مُساهمةموضوع: رد: ملف اكلات اقتصادية شهية    السبت سبتمبر 22, 2012 12:12 am

بنات لقيت بنات بتقول ان ماعندهاش كبة
وعاوزة تعمل كفتات وحركات
ركنت الفود بروسيسور وقلت اجرب اطبق عملى واشوف حاقدر اساعد ولا لأ واليكم النتائج بالتكاليف

كفتة الرز

اولا انا بشترى رز مطحون ناعم جاهز
الكيلو ب 5 جنيه عند عطارة فتح الله ماركت (مندوبة فتح الله ههههههههه)

وحاتجيبى يا ستى نص كيلو مفروم او ربع اللى يريحك وحسب امكاناتك
الكيلو بلدى مفروم ب 55 عند جزارة فتح الله
والسودانى الصابح الطازة ب 42 او 45
او شوفى انتى بتجيبى بكام ومن فين
يبقى النص تقريبا لو على اغلى تقدير ب 27.5 جنيه


النص كيلو بحطله 2 كوب سعة 250 مللى بودرة رز مطحون ناعم (ده حايخليكى ماتحتاجيش الكبة او الفود بروسيسور)
2 جنيه

حزمة خضرة كزبرة وشبت وبقدونس 1 جنيه
تقطعيهم بالسكينة ناعم (فرم ناعم بالسكين)

ملح وفلفل وكبابة صينى مطحونة او زنجبيل وقرفة نص جنيه

بصلتين مبشورين يالمبشرة ب 0.25 جنيه

-------
حاتعجنى كل ده مع بعض بايدك كويس اوى اوى اوى
ممكن تحتاجى تنعمى ايدك بشوية ماية
المهم تعجنى كويس بايدك وتصبعى

الكمية حاتعملك مش اقل من 50 صوباع كفتة

وابقى نعمى ايدك بالماية عشان تطلع ملساء ورصيهم فى طبق فى التلاجة يمسكوا نفسهم

وبعد نص ساعة او ساعة طلعيهم اقليم

كده اتكلفتى 3 جنيه زيت للقلية (ماهو مش حانستعمل اكتر من 3 الزجاجة )
وممكن تدهنى الصينية زيت كويس اوى وترصيهم فيها
و تدهنى بالفرشاة علىالكفتة من فوق زيت تانى وتدخليهم الفرن لو عاوز (بس احتمال تنشف عشان الرز

كده التوتال كام؟
34.25 جنيه
حايتقسموا على يومين يبقى تكلفة اليوم
17.25 جنيه

يوم تقدميها مع مكرونة وسلطة
يبقى كيس مكرونة او كيسين حسب افراد اسرتك وسنهم
وصلصة وبصل وتوابل للمكرونة يعنى ممكن نقول 5 جنيه كمان و 3 سلطة
25.25 جنيه لو كيسين مكرونة

اليوم التانى (النص التانى من الكفتة )
يوم تانى تقدميها مع بصلصة الطماطم والبطاطس المكعبات ومعاها رز ابيض
يبقى زودى حوالى 7 جنيه على ال 17.25
1.25 نص كيلو بطاطس
2.5 نص كيلو رز
و 3.5 جنيه مابين زيت وطماطم وبصل وصلصة
24.25 جنيه ليوم الرز والبطاطس اللى فى الصوص مع الكفتة

اللى بعمله ده لخمس افراد او 4
انا اسرتى فردين وطفلة صغننة
بس بعمل حساباتى معاكم كأنها 5 افراد

اتمنى اكون ساعدتكم
انا بطبق عملى على نفسى والله عشان اشوف حايكون الكلام دقيق ولا لأ
ربنا يعينكم كلكم ويسعدكم
[/b]
الرجوع الى أعلى الصفحة اذهب الى الأسفل
معاينة صفحة البيانات الشخصي للعضو
as7btko
Admin
avatar

عدد المساهمات : 131
نقاط : 312
تاريخ التسجيل : 16/09/2012
العمر : 35

مُساهمةموضوع: رد: ملف اكلات اقتصادية شهية    السبت سبتمبر 22, 2012 3:59 am

تححححححفة يا ريمو يا ام الافكار



لا و بالاسعار كمان



هيتم التطبيق ان شاء الله



جزاكى الله كل الخير و رزقك بالحلال الوفير
الرجوع الى أعلى الصفحة اذهب الى الأسفل
معاينة صفحة البيانات الشخصي للعضو http://as7bty.forumegypt.net
 
ملف اكلات اقتصادية شهية
استعرض الموضوع السابق استعرض الموضوع التالي الرجوع الى أعلى الصفحة 
صفحة 1 من اصل 1

صلاحيات هذا المنتدى:لاتستطيع الرد على المواضيع في هذا المنتدى
اساحبتى :: منتدى ست البيت :: تدبير منزلى و توفير-
انتقل الى: